תהלים פרק י

(א) למה יהוה תעמד ברחוק תעלים לעתות בצרה: (ב) בגאות רשע ידלק עני יתפשו במזמות זו חשבו: (ג) כי הלל רשע על תאות נפשו ובצע ברך נאץ יהוה: (ד) רשע כגבה אפו בל ידרש אין אלהים כל מזמותיו: (ה) יחילו דרכו בכל עת מרום משפטיך מנגדו כל צורריו יפיח בהם: (ו) אמר בלבו בל אמוט לדר ודר אשר לא ברע: (ז) אלה פיהו מלא ומרמות ותך תחת לשונו עמל ואון: (ח) ישב במארב חצרים במסתרים יהרג נקי עיניו לחלכה יצפנו: (ט) יארב במסתר כאריה בסכה יארב לחטוף עני יחטף עני במשכו ברשתו: (י) ודכה (ידכה) ישח ונפל בעצומיו חלכאים (חל כאים): (יא) אמר בלבו שכח אל הסתיר פניו בל ראה לנצח: (יב) קומה יהוה אל נשא ידך אל תשכח עניים (ענוים): (יג) על מה נאץ רשע אלהים אמר בלבו לא תדרש: (יד) ראתה כי אתה עמל וכעס תביט לתת בידך עליך יעזב חלכה יתום אתה היית עוזר: (טו) שבר זרוע רשע ורע תדרוש רשעו בל תמצא: (טז) יהוה מלך עולם ועד אבדו גוים מארצו: (יז) תאות ענוים שמעת יהוה תכין לבם תקשיב אזנך: (יח) לשפט יתום ודך בל יוסיף עוד לערץ אנוש מן הארץ: