בית המדרש

  • פרשת שבוע ותנ"ך
  • ספר תהילים
לחץ להקדשת שיעור זה

תהילים סדר י'

סידרא י בתהילים (מזמורים עג - עח, לז)

undefined

הרב מוטי דשא

י"א תמוז תשפ"א
5 דק' קריאה 18 דק' האזנה
תהילים, פרק ע"ג
(א) מִזְמוֹר לְאָסָף, אַךְ טוֹב לְיִשְׂרָאֵל, אֱ לֹהִים לְבָרֵי לֵבָב: (ב) וַאֲנִי כִּמְעַט (כתיב: נטוי) נָטָיוּ רַגְלָי, כְּאַיִן (כתיב: שפכה) שֻׁפְּכוּ אֲשֻׁרָי: (ג) כִּי קִנֵּאתִי בַּהוֹלְלִים, שְׁלוֹם רְשָׁעִים אֶרְאֶה: (ד) כִּי אֵין חַרְצֻבּוֹת לְמוֹתָם וּבָרִיא אוּלָם: (ה) בַּעֲמַל אֱנוֹשׁ אֵינֵמוֹ, וְעִם אָדָם לֹא יְנֻגָּעוּ: (ו) לָכֵן עֲנָקַתְמוֹ גַאֲוָה, יַעֲטָף שִׁית חָמָס לָמוֹ: (ז) יָצָא מֵחֵלֶב עֵינֵמוֹ, עָבְרוּ מַשְׂכִּיּוֹת לֵבָב: (ח) יָמִיקוּ וִידַבְּרוּ בְרָע עֹשֶׁק, מִמָּרוֹם יְדַבֵּרוּ: (ט) שַׁתּוּ בַשָּׁמַיִם פִּיהֶם, וּלְשׁוֹנָם תִּהֲלַךְ בָּאָרֶץ: (י) לָכֵן (כתיב: ישיב) יָשׁוּב עַמּוֹ הֲלֹם, וּמֵי מָלֵא יִמָּצוּ לָמוֹ: (יא) וְאָמְרוּ אֵיכָה יָדַע אֵ ל, וְיֵשׁ דֵּעָה בְעֶלְיוֹן: (יב) הִנֵּה אֵלֶּה רְשָׁעִים, וְשַׁלְוֵי עוֹלָם הִשְׂגּוּ חָיִל: (יג) אַךְ רִיק זִכִּיתִי לְבָבִי, וָאֶרְחַץ בְּנִקָּיוֹן כַּפָּי: (יד) וָאֱהִי נָגוּעַ כָּל הַיּוֹם, וְתוֹכַחְתִּי לַבְּקָרִים: (טו) אִם אָמַרְתִּי אֲסַפְּרָה כְמוֹ, הִנֵּה דוֹר בָּנֶיךָ בָגָדְתִּי: (טז) וָאֲחַשְּׁבָה לָדַעַת זֹאת, עָמָל (כתיב: היא) הוּא בְעֵינָי: (יז) עַד אָבוֹא אֶל מִקְדְּשֵׁי אֵ ל, אָבִינָה לְאַחֲרִיתָם: (יח) אַךְ בַּחֲלָקוֹת תָּשִׁית לָמוֹ, הִפַּלְתָּם לְמַשּׁוּאוֹת: (יט) אֵיךְ הָיוּ לְשַׁמָּה כְרָגַע, סָפוּ תַמּוּ מִן בַּלָּהוֹת: (כ) כַּחֲלוֹם מֵהָקִיץ, ה' בָּעִיר צַלְמָם תִּבְזֶה: (כא) כִּי יִתְחַמֵּץ לְבָבִי, וְכִלְיוֹתַי אֶשְׁתּוֹנָן: (כב) וַאֲנִי בַעַר וְלֹא אֵדָע, בְּהֵמוֹת הָיִיתִי עִמָּךְ: (כג) וַאֲנִי תָמִיד עִמָּךְ, אָחַזְתָּ בְּיַד יְמִינִי: (כד) בַּעֲצָתְךָ תַנְחֵנִי, וְאַחַר כָּבוֹד תִּקָּחֵנִי: (כה) מִי לִי בַשָּׁמָיִם, וְעִמְּךָ לֹא חָפַצְתִּי בָאָרֶץ: (כו) כָּלָה שְׁאֵרִי וּלְבָבִי, צוּר לְבָבִי וְחֶלְקִי אֱ לֹהִים לְעוֹלָם: (כז) כִּי הִנֵּה רְחֵקֶיךָ יֹאבֵדוּ, הִצְמַתָּה כָּל זוֹנֶה מִמֶּךָּ: (כח) וַאֲנִי קִרְבַת אֱ לֹהִים לִי טוֹב, שַׁתִּי בַּה' אֱ לֹהִים מַחְסִי, לְסַפֵּר כָּל מַלְאֲכוֹתֶיךָ:
תהילים, פרק ע"ד
(א) מַשְׂכִּיל לְאָסָף, לָמָה אֱ לֹהִים זָנַחְתָּ לָנֶצַח, יֶעְשַׁן אַפְּךָ בְּצֹאן מַרְעִיתֶךָ: (ב) זְכֹר עֲדָתְךָ קָנִיתָ קֶּדֶם גָּאַלְתָּ שֵׁבֶט נַחֲלָתֶךָ, הַר צִיּוֹן זֶה שָׁכַנְתָּ בּוֹ: (ג) הָרִימָה פְעָמֶיךָ לְמַשֻּׁאוֹת נֶצַח, כָּל הֵרַע אוֹיֵב בַּקֹּדֶשׁ: (ד) שָׁאֲגוּ צֹרְרֶיךָ בְּקֶרֶב מוֹעֲדֶךָ, שָׂמוּ אוֹתֹתָם אֹתוֹת: (ה) יִוָּדַע כְּמֵבִיא לְמָעְלָה, בִּסְבָךְ עֵץ קַרְדֻּמּוֹת: (ו) (כתיב: ועת) וְעַתָּה פִּתּוּחֶיהָ יָּחַד, בְּכַשִּׁיל וְכֵילַפּוֹת יַהֲלֹמוּן: (ז) שִׁלְחוּ בָאֵשׁ מִקְדָּשֶׁךָ, לָאָרֶץ חִלְּלוּ מִשְׁכַּן שְׁמֶךָ: (ח) אָמְרוּ בְלִבָּם נִינָם יָחַד, שָׂרְפוּ כָל מוֹעֲדֵי אֵ ל בָּאָרֶץ: (ט) אוֹתֹתֵינוּ לֹא רָאִינוּ, אֵין עוֹד נָבִיא, וְלֹא אִתָּנוּ יֹדֵעַ עַד מָה: (י) עַד מָתַי אֱ לֹהִים יְחָרֶף צָר, יְנָאֵץ אוֹיֵב שִׁמְךָ לָנֶצַח: (יא) לָמָּה תָשִׁיב יָדְךָ וִימִינֶךָ, מִקֶּרֶב (כתיב: חוקך) חֵיקְךָ כַלֵּה: (יב) וֵא לֹהִים מַלְכִּי מִקֶּדֶם, פֹּעֵל יְשׁוּעוֹת בְּקֶרֶב הָאָרֶץ: (יג) אַתָּה פוֹרַרְתָּ בְעָזְּךָ יָם, שִׁבַּרְתָּ רָאשֵׁי תַנִּינִים עַל הַמָּיִם: (יד) אַתָּה רִצַּצְתָּ רָאשֵׁי לִוְיָתָן, תִּתְּנֶנּוּ מַאֲכָל לְעָם לְצִיִּים: (טו) אַתָּה בָקַעְתָּ מַעְיָן וָנָחַל, אַתָּה הוֹבַשְׁתָּ נַהֲרוֹת אֵיתָן: (טז) לְךָ יוֹם אַף לְךָ לָיְלָה, אַתָּה הֲכִינוֹתָ מָאוֹר וָשָׁמֶשׁ: (יז) אַתָּה הִצַּבְתָּ כָּל גְּבוּלוֹת אָרֶץ, קַיִץ וָחֹרֶף אַתָּה יְצַרְתָּם: (יח) זְכָר זֹאת אוֹיֵב חֵרֵף ה', וְעַם נָבָל נִאֲצוּ שְׁמֶךָ: (יט) אַל תִּתֵּן לְחַיַּת נֶפֶשׁ תּוֹרֶךָ, חַיַּת עֲנִיֶּיךָ אַל תִּשְׁכַּח לָנֶצַח: (כ) הַבֵּט לַבְּרִית, כִּי מָלְאוּ מַחֲשַׁכֵּי אֶרֶץ נְאוֹת חָמָס: (כא) אַל יָשֹׁב דַּךְ נִכְלָם, עָנִי וְאֶבְיוֹן יְהַלְלוּ שְׁמֶךָ: (כב) קוּמָה אֱ לֹהִים רִיבָה רִיבֶךָ, זְכֹר חֶרְפָּתְךָ מִנִּי נָבָל כָּל הַיּוֹם: (כג) אַל תִּשְׁכַּח קוֹל צֹרְרֶיךָ, שְׁאוֹן קָמֶיךָ עֹלֶה תָמִיד:
תהילים, פרק ע"ה
(א) לַמְנַצֵּחַ אַל תַּשְׁחֵת, מִזְמוֹר לְאָסָף שִׁיר: (ב) הוֹדִינוּ לְּךָ אֱ לֹהִים הוֹדִינוּ וְקָרוֹב שְׁמֶךָ, סִפְּרוּ נִפְלְאוֹתֶיךָ: (ג) כִּי אֶקַּח מוֹעֵד, אֲנִי מֵישָׁרִים אֶשְׁפֹּט: (ד) נְמֹגִים אֶרֶץ וְכָל יֹשְׁבֶיהָ, אָנֹכִי תִכַּנְתִּי עַמּוּדֶיהָ סֶּלָה: (ה) אָמַרְתִּי לַהוֹלְלִים אַל תָּהֹלּוּ, וְלָרְשָׁעִים אַל תָּרִימוּ קָרֶן: (ו) אַל תָּרִימוּ לַמָּרוֹם קַרְנְכֶם, תְּדַבְּרוּ בְצַוָּאר עָתָק: (ז) כִּי לֹא מִמּוֹצָא וּמִמַּעֲרָב, וְלֹא מִמִּדְבַּר הָרִים: (ח) כִּי אֱ לֹהִים שֹׁפֵט, זֶה יַשְׁפִּיל וְזֶה יָרִים: (ט) כִּי כוֹס בְּיַד ה' וְיַיִן חָמַר מָלֵא מֶסֶךְ וַיַּגֵּר מִזֶּה, אַךְ שְׁמָרֶיהָ יִמְצוּ יִשְׁתּוּ, כֹּל רִשְׁעֵי אָרֶץ: (י) וַאֲנִי אַגִּיד לְעֹלָם, אֲזַמְּרָה לֵא לֹהֵי יַעֲקֹב: (יא) וְכָל קַרְנֵי רְשָׁעִים אֲגַדֵּעַ, תְּרוֹמַמְנָה קַרְנוֹת צַדִּיק:
תהילים, פרק ע"ו
(א) לַמְנַצֵּחַ בִּנְגִינֹת, מִזְמוֹר לְאָסָף שִׁיר: (ב) נוֹדָע בִּיהוּדָה אֱ לֹהִים, בְּיִשְׂרָאֵל גָּדוֹל שְׁמוֹ: (ג) וַיְהִי בְשָׁלֵם סוּכּוֹ, וּמְעוֹנָתוֹ בְצִיּוֹן: (ד) שָׁמָּה שִׁבַּר רִשְׁפֵי קָשֶׁת, מָגֵן וְחֶרֶב וּמִלְחָמָה סֶלָה: (ה) נָאוֹר אַתָּה אַדִּיר מֵהַרְרֵי טָרֶף: (ו) אֶשְׁתּוֹלְלוּ אַבִּירֵי לֵב נָמוּ שְׁנָתָם, וְלֹא מָצְאוּ כָל אַנְשֵׁי חַיִל יְדֵיהֶם: (ז) מִגַּעֲרָתְךָ אֱ לֹהֵי יַעֲקֹב, נִרְדָּם וְרֶכֶב וָסוּס: (ח) אַתָּה נוֹרָא אַתָּה וּמִי יַעֲמֹד לְפָנֶיךָ מֵאָז אַפֶּךָ: (ט) מִשָּׁמַיִם הִשְׁמַעְתָּ דִּין, אֶרֶץ יָרְאָה וְשָׁקָטָה: (י) בְּקוּם לַמִּשְׁפָּט אֱ לֹהִים, לְהוֹשִׁיעַ כָּל עַנְוֵי אֶרֶץ סֶלָה: (יא) כִּי חֲמַת אָדָם תּוֹדֶךָּ, שְׁאֵרִית חֵמֹת תַּחְגֹּר: (יב) נִדְרוּ וְשַׁלְּמוּ לַה' אֱ לֹהֵיכֶם, כָּל סְבִיבָיו, יֹבִילוּ שַׁי לַמּוֹרָא: (יג) יִבְצֹר רוּחַ נְגִידִים, נוֹרָא לְמַלְכֵי אָרֶץ:
תהילים, פרק ע"ז
(א) לַמְנַצֵּחַ עַל (כתיב: ידיתון) יְדוּתוּן לְאָסָף מִזְמוֹר: (ב) קוֹלִי אֶל אֱ לֹהִים וְאֶצְעָקָה, קוֹלִי אֶל אֱ לֹהִים וְהַאֲזִין אֵלָי: (ג) בְּיוֹם צָרָתִי ה' דָּרָשְׁתִּי, יָדִי לַיְלָה נִגְּרָה וְלֹא תָפוּג, מֵאֲנָה הִנָּחֵם נַפְשִׁי: (ד) אֶזְכְּרָה אֱ לֹהִים וְאֶהֱמָיָה, אָשִׂיחָה וְתִתְעַטֵּף רוּחִי סֶלָה: (ה) אָחַזְתָּ שְׁמֻרוֹת עֵינָי, נִפְעַמְתִּי וְלֹא אֲדַבֵּר: (ו) חִשַּׁבְתִּי יָמִים מִקֶּדֶם, שְׁנוֹת עוֹלָמִים: (ז) אֶזְכְּרָה נְגִינָתִי בַּלָּיְלָה, עִם לְבָבִי אָשִׂיחָה, וַיְחַפֵּשׂ רוּחִי: (ח) הַלְעוֹלָמִים יִזְנַח ה', וְלֹא יֹסִיף לִרְצוֹת עוֹד: (ט) הֶאָפֵס לָנֶצַח חַסְדּוֹ, גָּמַר אֹמֶר לְדֹר וָדֹר: (י) הֲשָׁכַח חַנּוֹת אֵ ל, אִם קָפַץ בְּאַף רַחֲמָיו סֶלָה: (יא) וָאֹמַר חַלּוֹתִי הִיא, שְׁנוֹת יְמִין עֶלְיוֹן: (יב) (כתיב: אזכיר) אֶזְכּוֹר מַעַלְלֵי יָ הּ, כִּי אֶזְכְּרָה מִקֶּדֶם פִּלְאֶךָ: (יג) וְהָגִיתִי בְכָל פָּעֳלֶךָ, וּבַעֲלִילוֹתֶיךָ אָשִׂיחָה: (יד) אֱ לֹהִים בַּקֹּדֶשׁ דַּרְכֶּךָ, מִי אֵ ל גָּדוֹל כֵּא לֹהִים: (טו) אַתָּה הָאֵ ל עֹשֵׂה פֶלֶא, הוֹדַעְתָּ בָעַמִּים עֻזֶּךָ: (טז) גָּאַלְתָּ בִּזְרוֹעַ עַמֶּךָ, בְּנֵי יַעֲקֹב וְיוֹסֵף סֶלָה: (יז) רָאוּךָ מַּיִם אֱ לֹהִים רָאוּךָ מַּיִם יָחִילוּ, אַף יִרְגְּזוּ תְהֹמוֹת: (יח) זֹרְמוּ מַיִם עָבוֹת קוֹל נָתְנוּ שְׁחָקִים, אַף חֲצָצֶיךָ יִתְהַלָּכוּ: (יט) קוֹל רַעַמְךָ בַּגַּלְגַּל הֵאִירוּ בְרָקִים תֵּבֵל, רָגְזָה וַתִּרְעַשׁ הָאָרֶץ: (כ) בַּיָּם דַּרְכֶּךָ (כתיב: ושביליך) וּשְׁבִילְךָ בְּמַיִם רַבִּים, וְעִקְּבוֹתֶיךָ לֹא נֹדָעוּ: (כא) נָחִיתָ כַצֹּאן עַמֶּךָ, בְּיַד מֹשֶׁה וְאַהֲרֹן:
תהילים, פרק ע"ח
(א) מַשְׂכִּיל לְאָסָף, הַאֲזִינָה עַמִּי תּוֹרָתִי, הַטּוּ אָזְנְכֶם לְאִמְרֵי פִי: (ב) אֶפְתְּחָה בְמָשָׁל פִּי, אַבִּיעָה חִידוֹת מִנִּי קֶדֶם: (ג) אֲשֶׁר שָׁמַעְנוּ וַנֵּדָעֵם, וַאֲבוֹתֵינוּ סִפְּרוּ לָנוּ: (ד) לֹא נְכַחֵד מִבְּנֵיהֶם לְדוֹר אַחֲרוֹן מְסַפְּרִים תְּהִלּוֹת ה', וֶעֱזוּזוֹ וְנִפְלְאֹתָיו אֲשֶׁר עָשָׂה: (ה) וַיָּקֶם עֵדוּת בְּיַעֲקֹב וְתוֹרָה שָׂם בְּיִשְׂרָאֵל, אֲשֶׁר צִוָּה אֶת אֲבוֹתֵינוּ, לְהוֹדִיעָם לִבְנֵיהֶם: (ו) לְמַעַן יֵדְעוּ דּוֹר אַחֲרוֹן בָּנִים יִוָּלֵדוּ, יָקֻמוּ וִיסַפְּרוּ לִבְנֵיהֶם: (ז) וְיָשִׂימוּ בֵא לֹהִים כִּסְלָם, וְלֹא יִשְׁכְּחוּ מַעַלְלֵי אֵ ל, וּמִצְוֹתָיו יִנְצֹרוּ: (ח) וְלֹא יִהְיוּ כַּאֲבוֹתָם דּוֹר סוֹרֵר וּמֹרֶה, דּוֹר לֹא הֵכִין לִבּוֹ, וְלֹא נֶאֶמְנָה אֶת אֵ ל רוּחוֹ: (ט) בְּנֵי אֶפְרַיִם נוֹשְׁקֵי רוֹמֵי קָשֶׁת, הָפְכוּ בְּיוֹם קְרָב: (י) לֹא שָׁמְרוּ בְּרִית אֱ לֹהִים, וּבְתוֹרָתוֹ מֵאֲנוּ לָלֶכֶת: (יא) וַיִּשְׁכְּחוּ עֲלִילוֹתָיו, וְנִפְלְאוֹתָיו אֲשֶׁר הֶרְאָם: (יב) נֶגֶד אֲבוֹתָם עָשָׂה פֶלֶא, בְּאֶרֶץ מִצְרַיִם שְׂדֵה צֹעַן: (יג) בָּקַע יָם וַיַּעֲבִירֵם, וַיַּצֶּב מַיִם כְּמוֹ נֵד: (יד) וַיַּנְחֵם בֶּעָנָן יוֹמָם, וְכָל הַלַּיְלָה בְּאוֹר אֵשׁ: (טו) יְבַקַּע צֻרִים בַּמִּדְבָּר, וַיַּשְׁקְ כִּתְהֹמוֹת רַבָּה: (טז) וַיּוֹצִא נוֹזְלִים מִסָּלַע, וַיּוֹרֶד כַּנְּהָרוֹת מָיִם: (יז) וַיּוֹסִיפוּ עוֹד לַחֲטֹא לוֹ, לַמְרוֹת עֶלְיוֹן בַּצִּיָּה: (יח) וַיְנַסּוּ אֵ ל בִּלְבָבָם, לִשְׁאָל אֹכֶל לְנַפְשָׁם: (יט) וַיְדַבְּרוּ בֵּא לֹהִים, אָמְרוּ הֲיוּכַל אֵ ל, לַעֲרֹךְ שֻׁלְחָן בַּמִּדְבָּר: (כ) הֵן הִכָּה צוּר וַיָּזוּבוּ מַיִם וּנְחָלִים יִשְׁטֹפוּ, הֲגַם לֶחֶם יוּכַל תֵּת, אִם יָכִין שְׁאֵר לְעַמּוֹ: (כא) לָכֵן שָׁמַע ה' וַיִּתְעַבָּר, וְאֵשׁ נִשְּׂקָה בְיַעֲקֹב, וְגַם אַף עָלָה בְיִשְׂרָאֵל: (כב) כִּי לֹא הֶאֱמִינוּ בֵּא לֹהִים, וְלֹא בָטְחוּ בִּישׁוּעָתוֹ: (כג) וַיְצַו שְׁחָקִים מִמָּעַל, וְדַלְתֵי שָׁמַיִם פָּתָח: (כד) וַיַּמְטֵר עֲלֵיהֶם מָן לֶאֱכֹל, וּדְגַן שָׁמַיִם נָתַן לָמוֹ: (כה) לֶחֶם אַבִּירִים אָכַל אִישׁ, צֵידָה שָׁלַח לָהֶם לָשֹׂבַע: (כו) יַסַּע קָדִים בַּשָּׁמָיִם, וַיְנַהֵג בְּעֻזּוֹ תֵימָן: (כז) וַיַּמְטֵר עֲלֵיהֶם כֶּעָפָר שְׁאֵר, וּכְחוֹל יַמִּים עוֹף כָּנָף: (כח) וַיַּפֵּל בְּקֶרֶב מַחֲנֵהוּ, סָבִיב לְמִשְׁכְּנֹתָיו: (כט) וַיֹּאכְלוּ וַיִּשְׂבְּעוּ מְאֹד, וְתַאֲוָתָם יָבִא לָהֶם: (ל) לֹא זָרוּ מִתַּאֲוָתָם, עוֹד אָכְלָם בְּפִיהֶם: (לא) וְאַף אֱ לֹהִים עָלָה בָהֶם וַיַּהֲרֹג בְּמִשְׁמַנֵּיהֶם, וּבַחוּרֵי יִשְׂרָאֵל הִכְרִיעַ: (לב) בְּכָל זֹאת חָטְאוּ עוֹד, וְלֹא הֶאֱמִינוּ בְּנִפְלְאוֹתָיו: (לג) וַיְכַל בַּהֶבֶל יְמֵיהֶם, וּשְׁנוֹתָם בַּבֶּהָלָה: (לד) אִם הֲרָגָם וּדְרָשׁוּהוּ, וְשָׁבוּ וְשִׁחֲרוּ אֵ ל: (לה) וַיִּזְכְּרוּ כִּי אֱ לֹהִים צוּרָם, וְאֵ ל עֶלְיוֹן גֹּאֲלָם: (לו) וַיְפַתּוּהוּ בְּפִיהֶם, וּבִלְשׁוֹנָם יְכַזְּבוּ לוֹ: (לז) וְלִבָּם לֹא נָכוֹן עִמּוֹ, וְלֹא נֶאֶמְנוּ בִּבְרִיתוֹ:




את המידע הדפסתי באמצעות אתר yeshiva.org.il