תהלים פרק כ

(א) למנצח מזמור לדוד: (ב) יענך יהוה ביום צרה ישגבך שם אלהי יעקב: (ג) ישלח עזרך מקדש ומציון יסעדך: (ד) יזכר כל מנחתך ועולתך ידשנה סלה: (ה) יתן לך כלבבך וכל עצתך ימלא: (ו) נרננה בישועתך ובשם אלהינו נדגל ימלא יהוה כל משאלותיך: (ז) עתה ידעתי כי הושיע יהוה משיחו יענהו משמי קדשו בגברות ישע ימינו: (ח) אלה ברכב ואלה בסוסים ואנחנו בשם יהוה אלהינו נזכיר: (ט) המה כרעו ונפלו ואנחנו קמנו ונתעודד: (י) יהוה הושיעה המלך יעננו ביום קראנו: