תהלים פרק ו

(א) למנצח בנגינות על השמינית מזמור לדוד: (ב) יהוה אל באפך תוכיחני ואל בחמתך תיסרני: (ג) חנני יהוה כי אמלל אני רפאני יהוה כי נבהלו עצמי: (ד) ונפשי נבהלה מאד ואת (ואתה) יהוה עד מתי: (ה) שובה יהוה חלצה נפשי הושיעני למען חסדך: (ו) כי אין במות זכרך בשאול מי יודה לך: (ז) יגעתי באנחתי אשחה בכל לילה מטתי בדמעתי ערשי אמסה: (ח) עששה מכעס עיני עתקה בכל צוררי: (ט) סורו ממני כל פעלי און כי שמע יהוה קול בכיי: (י) שמע יהוה תחנתי יהוה תפלתי יקח: (יא) יבשו ויבהלו מאד כל איבי ישבו יבשו רגע: