תהלים פרק סד

(א) למנצח מזמור לדוד: (ב) שמע אלהים קולי בשיחי מפחד אויב תצר חיי: (ג) תסתירני מסוד מרעים מרגשת פעלי און: (ד) אשר שננו כחרב לשונם דרכו חצם דבר מר: (ה) לירת במסתרים תם פתאם ירהו ולא ייראו: (ו) יחזקו למו דבר רע יספרו לטמון מוקשים אמרו מי יראה למו: (ז) יחפשו עולת תמנו חפש מחפש וקרב איש ולב עמק: (ח) וירם אלהים חץ פתאום היו מכותם: (ט) ויכשילוהו עלימו לשונם יתנדדו כל ראה בם: (י) וייראו כל אדם ויגידו פעל אלהים ומעשהו השכילו: (יא) ישמח צדיק ביהוה וחסה בו ויתהללו כל ישרי לב: