(א) לדוד שפטני יהוה כי אני בתמי הלכתי וביהוה בטחתי לא אמעד: (ב) בחנני יהוה ונסני צרופה (צרפה) כליותי ולבי: (ג) כי חסדך לנגד עיני והתהלכתי באמתך: (ד) לא ישבתי עם מתי שוא ועם נעלמים לא אבוא: (ה) שנאתי קהל מרעים ועם רשעים לא אשב: (ו) ארחץ בנקיון כפי ואסבבה את מזבחך יהוה: (ז) לשמע בקול תודה ולספר כל נפלאותיך: (ח) יהוה אהבתי מעון ביתך ומקום משכן כבודך: (ט) אל תאסף עם חטאים נפשי ועם אנשי דמים חיי: (י) אשר בידיהם זמה וימינם מלאה שחד: (יא) ואני בתמי אלך פדני וחנני: (יב) רגלי עמדה במישור במקהלים אברך יהוה: